बन्दाबन्दीको अवधिमा ६३ मुद्दा दर्ता, २९ जना जेल चलान

बन्दाबन्दीको अवधिमा ६३ मुद्दा दर्ता, २९ जना जेल चलान

दाङमा बन्दाबन्दीको समयमा २९ जना जेल चलान भएका छन्। लकडाउनको अवधिमा दाङ देउखुरी जिल्ला अदालतमा दर्ता भएका ६३ वटा मुद्दामा २९ जना जेल चलान भएको दाङ देउखुरी जिल्ला अदालतका न्यायाधीश रितेन्द्र थापाले जानकारी दिएका छन्।

शुक्रबार अदालतले आयोजना गरेको अन्तरक्रिया कार्यक्रममा थापाले यस्तो जानकारी दिएका हुन्।

अदालतमा सबैभन्दा धेरै ज्यान सम्बन्धी कसूरका १७ मुद्दा परेका छन्। त्यस्तै करणीसम्बन्धी १४ वटा, सवारी ज्यानका १० वटा, वनसम्बन्धी ९, बालविवाह कसूरका ३, लागूऔषध र ठगीसम्बन्धी २-२ वटा र नागरिकतासम्बन्धी, अपमानजनक व्यवहार, गर्भपतनसम्बन्धी र हातहतियार खरखजना मुद्दा १-१ गरी ६३ वटा मुद्दाहरू दर्ता भएको दाङ देउखुरी जिल्ला अदालतका न्यायाधीश थापाले जानकारी दिएका छन्।

४९ जना धरौटी तारिखमा छुटेका छन् भने १२ जना साधारण तारिखमा छुटेको न्यायाधीश थापाले जानकारी दिएका छन्। उनका अनुसार २१ जना फरार रहेका छन् भने ४ जनालाई अभिभावकको जिम्मा लगाइएको छ। ६३ मुद्दामध्ये ६१ वटा मुद्दाहरू फैसला भएका छन्। जसमध्ये २९ मुद्दा भिडियो कन्फ्रेन्स प्रयोग गरिएको थियो।

त्यसैगरी अदालतले बन्दाबन्दीको समयमा ८३ वटा मुद्दामा म्याद थप, ५१ मुद्दामा पक्राउ अनुमति र १ सय ११ मुद्दामा जरुरी पक्राउ पूर्जीका अनुमति दिएको समेत जानकारी दिए।

अदालतमा यस आर्थिक वर्षको हालसम्म १ हजार १ सय ७१ मुद्दा फर्स्याेट गरेको जिल्ला न्यायाधीश थापाले जानकारी दिएका हुन्। फर्स्याेट भएमध्ये ५ सय ८८ मुद्दा जिम्मेवारी सरी आएका र ५ सय ८३ मुद्दा यसै वर्ष दर्ता भएका मुद्दाहरू रहेका छन्।

न्यायाधीश थापाका अनुसार अदालतमा गत वर्ष जिम्मेवारी सरेर आएका १ हजार ८२ र नयाँ दर्ता भएका १ हजार ५ सय ३६ गरी २ हजार ६ सय  १८ मुद्दा रहेका छन्। 


Leave a Reply

Your email address will not be published.