बर्थिङ सेन्टर निर्माणको विषयमा विवाद हुँदा धनुषामा गोली चल्यो

बर्थिङ सेन्टर निर्माणको विषयमा विवाद हुँदा धनुषामा गोली चल्यो

बर्थिङ सेन्टर निर्माण गर्ने विषयमा विवाद हुँदा धनुषामा गोली चलेको छ। जिल्लाको विदेह नगरपालिका-२ दुहबीमा बर्थिङ सेन्टर निर्माण गर्ने विषयमा दुई पक्षबीच झडप हुँदा प्रहरीले गोली चलाएको हो। 

दुई पक्षबीच झडपहुँदा २० जनाभन्दा बढी मानिस घाइते भएका छन्। गम्भीर घाइते चारजनालाई उपचारको लागि प्रादेशिक अस्पताल जनकपुरमा भर्ना गरिएको विदेह नगरपालिकाका मेयर बेचन दासले जानकारी दिएका छन्। झडप नियन्त्रण गर्न प्रहरीले तीन राउण्ड हवाइ फायर र पाँच राउण्ड अश्रु ग्यास प्रहार गरेको उनले बताएका छन्।

नगरपालिकाको दुहबीस्थित विद्यालय छेउमा बर्थिङ सेन्टर निर्माण सुरु गर्न लाग्दा वडा नम्बर ३ गोबराहीका स्थानियले अवरोध गरेपछि विवाद सुरु भएको मेयर दासको भनाइ छ। 

बर्थिङ सेन्टर निर्माण गर्दा जग्गा अपुग भएपछि नगरपालिकाले विद्यालयको खाली जग्गा प्रयोग गर्न खोजेको छ। तर, विद्यालय निर्माण गर्न गोबराहीबासीले समेत गरेकोले बर्थिङ सेन्टर निर्माण गर्नुपूर्व आफूहरूसँग सल्लाह नगरिएको भन्दै उनीहरूले विरोध जनाएको स्थानीयवासीहरूको भनाइ छ। 

दुहबीका स्थानीयवासीहरू गाउँभित्र छिरेर आक्रमण गर्नुका साथै बाख्रासमेत काटिदिएको गोबराहीका स्थानीयहरूको दाबी छ। दुहबीका स्थानीयले गोबराहीका कतिपय पसलमा समेत आगजनि गरेको उनीहरूको आरोप छ।

झडपपछि इलाका प्रहरी कार्यालय दुहबीमा भएको वार्तामा बर्थिङ सेन्टर निर्माण गर्ने सहमति भएको मेयर दासले बताएका छन्। 'बर्थिङ सेन्टर निर्माण गर्न दुबै पक्षबीच लिखित सहमति भएको छ,' मेयर दासले भने,' निर्माण कार्यमा कसैले अवरोध नगर्ने सहमति भएको छ, सहमति लगत्तै निर्माण कार्यसमेत सुरु भइसकेको छ।'

साथै झडपम घाइते भएकाहरूको उपचारका साथै झडपको क्रममा भएको धजनको क्षतिबारे छानबिन गर्न समेत समिति बनाइएको उनले बताए।


Leave a Reply

Your email address will not be published.