झापामा थप ६ जनामा कोरोना संक्रमण पुष्टि भएको छ। संक्रमण पुष्टि हुनेमा मेचीनगर नगरपालिकाका ५ र बिर्तामोड नगरपालिकाका एक जना रहेको जिल्ला स्वास्थ्य कार्यालय झापाका फोकल पर्सन जीवन चौलागाईले बताए। 

मेचीनगर नगरपालिकामा एक महिलासहित ५ जनामा कोरोना संक्रमण पुष्टि भएको हो। संक्रमित हुनेमा मेचीनगर नगरपालिका १४ की  ३५ वर्षीया महिला रहेकी छिन्। 
       
उनी अतिथि सदन क्वारेन्टाइनमा बसेकी थिइन्। त्यस्तै मेचीनगर १ , ५, १० र १५ का एक/एक जना पुरुषमा संक्रमण देखिएको छ। उनीहरू कवि शिरोमणि मावि, आदर्श मावि , काँकडभिट्टा मावि क्वारेन्टाइनमा बसेका थिए।

संक्रमितहरू भारतबाट आएका व्यक्ति भएको मेचीनगर १० का वडाध्यक्ष सुदय पनेरु ( सुबेस) ले बताए। मेचीनगरमा संक्रमितको संख्या ४६ जना पुगेको छ।

बिर्तामोड नगरपालिका ३ का ४७ वर्षीय पुरुष रहेका छन्। उनी साउदीबाट फर्केको वडाध्यक्ष भोजराज सिटौलाले बताए।  ति पुरुष कंचनजंघा इन्स्टिच्यूट क्वारेन्टाइनमा बसेका थिए। योसँगै बिर्तामोडमा कोरोना संक्रमितको संख्या ६ पुगेको छ।

यसअघि बिर्तामोड ४ का दुई पुरुष,  ७ एक महिला र एक  पुरुष तथा ५ का एक पुरुषमा संक्रमण देखिएको थियो। झापामा कोरोना संक्रमितको संख्या २९७  पुगेको छ।