बारेकोट पहिरोमा पुरिएका ७ को शव भेटियो, ५ जना अझै बेपत्ता

बारेकोट पहिरोमा पुरिएका ७ को शव भेटियो, ५ जना अझै बेपत्ता

जाजरकोटको बारेकोट गाउँपालिका–४ मा गयराती गएको पहिरोमा पुरिएका ७ जनाको शव फेला परेको छ। पहिरोमा बेपत्ता भएका १२ जना मध्य ७ जनाको शव फेला परेको हो। फेला परेका शव मध्य हालसम्म ४ जनाको मात्रै सनाखत भएको छ।

पहिरोमा पुरिएर मृत्यु भएका गोपाल सार्की, अर्जुन सार्की, डिल्ली सार्की र वीरेन्द्र सार्कीको सनाखत भएको जिल्ला प्रहरी कार्यालय जाजरकोटका प्रमुख प्रहरी नायब उपरीक्षक किशोर श्रेष्ठले जानकारी दिए। श्रेष्ठका अनुसार चारै जना एकै परिवारका सदस्य हुन्। 

अझै पाँच जना बेपत्ता छन्। उद्धारका लागि जिल्ला प्रहरी कार्यालयबाट प्रहरी निरीक्षकको नेतृत्वमा प्रहरी खटाइएको छ। बिहीबार राति परेको अविरल वर्षासँगै गएको पहिरोमा बारेकोट–४ का दुई घर पुरिएका थिए।

मुख्यमन्त्रीद्वारा शोक वक्तव्य

बिहीबार राती बारेकोट गाउँपालिका र शुक्रबार बिहान रुकुम (पश्चिम)को आठबिसकोट नगरपालिकामा वर्षासँगै गएको पहिरोमा भएको मानवीय क्षतिप्रति मुख्यमन्त्री महेन्द्रबहादुर शाहीले दुःख व्यक्त गरेका छन्।

शुक्रबार विज्ञप्ती जारी गर्दै मुख्यमन्त्री शाहीले बारेकोट गाउँपालिकामा गएको पहिरोमा परी ७ जनाको दुःखद् निधन हुनुका साथै ५ जना अझै अहिलेसम्म बेपत्ता र रुकुम (पश्चिम) आठविसकोट नगरपालिका रेझेखोलामा गएको पहिरोमा परि दुई जनाको निधन र एक जना घाइते भएको घटनाले आफू स्वब्ध भएको बताएका छन्। 

विज्ञप्तीमा पहिरोमा परी बेपत्ता भएका नागरिकहरूको खोजी कार्य, विस्थापित परिवारका लागि राहत सामग्री एवं मृतकका परिवारलाई प्रदेश सरकारको तर्फबाट गरिएको विपद् जोखिम विमा रकम भुक्तानी दिने व्यवस्था गर्न सम्बन्धित निकायलाई निर्देशन दिइसकिएको जनाइएको छ।


Leave a Reply

Your email address will not be published.