साउनदेखि बस गुडाउने साझाकाे तयारी

 साउनदेखि बस गुडाउने साझाकाे तयारी

सरकारको समेत सेयर रहेको साझा यातायातले साउनदेखि छाेटो दूरीका बस चलाउने तयारी गरेको छ।

मन्त्रिपरिषदकाे असार २३ मा बसेकाे बैठकले स्वास्थ्य सुरक्षाका मापदण्ड पालना गरी छोटो दूरीका सार्वजनिक यातायात सञ्चालन गर्ने निर्णय गरे पनि व्यवसायीहरूले सर्त तेर्स्याइरहेका बेला साझाले यो कदम लिएको छ।

साझा यातायातका प्रमुख कार्यकारी अधिकृत (सिइओ) भुषण तुलाधारले सरकारको निर्णय सकारात्मक रुपमा लिइएको र साउन १ गतेदेखि सञ्चालनको तयारी थालिएको बताए। ‘कतिपय कर्मचारी बाहिर हुनुहुन्छ, उहाँहरूलाई बोलाएका छौँ। बस मर्मत सम्भार गरेर चलाउने तयारी छ। लक्ष्य साउन १ गतेदेखि बस चलाउने रहेपनि तलमाथि हुनसक्छ।’

सरकारले काठमाडौं उपत्यकाको हकमा एकै जिल्ला मानेर बस चलाउन दिने भनेको छ, भने उपत्यका बाहिरको हकमा एक जिल्लाबाट अर्काे जिल्लामा चलाउन पाइँदैन।

बसमा ५० प्रतिशत यात्रु, चालक र सहचालकलाई अनिवार्य मास्क पञ्जा, यात्रु चढ्ने समयमा बसको ढोका र सवारसाधनभित्र स्यानिटाइजर गरिने उनले बताए।

सरकारले घर बाहिर निस्किदा मास्क अनिवार्य भनेको छ। तर, मास्क बिना नै बसमा यात्रा गर्न खोज्नेलाई सहचालकले रोक्न सक्ने र यस्तो बेला बलजफ्ती गर्न खोजे सरकारले सहयोग गर्नुुपर्ने उनले बताए।

साझासँग अहिले ७१ बस छन्। तीमध्ये चार लामो दूरीका हुन्। सुरुमा छोटो दूरीका सबै गाडी नचलाइने तर आवश्यकता अनुसार संख्या बढाइने उनले बताए।

सरकारले अहिलेको अवस्थामा साविकको भाडादरमा ५०  प्रतिशत बढी लिन पाउने व्यवस्था गरेको छ। तर, साझाले त्योभन्दा कम भाडादरमै यात्रा गराउने तयारी गरेको छ। हाल काठमाडौँ उपत्यकामा यात्रु बसमा चढ्न साथ १५ रुपैयाँ लिइन्छ। तर, अब ५० प्रतिशत भाडादर वृद्धि भएमा २२ रुपैयाँ लिने भनिएको छ।

 साझा यातायातका अध्यक्ष कनकमणि दीक्षितले भौतिक दूरी कायम गरी आगामी केही दिनमा बस चलाउने तयारी भएको सामाजिक सञ्जालमा उल्लेख गरेको छ।


Leave a Reply

Your email address will not be published.