ककनीमा पार्कदेखि क्यासिनोसम्म चलाउने तयारी, मोडालिटी तय गर्न कार्यदल 

ककनीमा पार्कदेखि क्यासिनोसम्म चलाउने तयारी, मोडालिटी तय गर्न कार्यदल 

नुवाकोटको ककनीमा सरकारी स्वामित्वमा रहेको सार्वजनिक जग्गामा सरकारले व्यावसायिक उपभोगको नीति लिएको छ। 

काठमाडौं उपत्यकाबाट नजिक रहेको र हिमशृंखलाको दृष्य अवलोकन गर्न पाइने ककनी पर्यटकीय गन्तव्य हो। ककनीमा रहेको सार्वजनिक जग्गा हाल पर्यटन विभाग, तारागाउँ विकास समिति, नेपाल पर्वतारोहण संघ, नेपाल स्काउट र अन्य निकायहरूले प्रयोग गर्दै आएकोमा अब व्यवसायिक प्रयोजनमा समेत लगिने भएको हो। 

सरकारले त्यहाँको सार्वजनिक जग्गाको एकीकृत गुरुयोजना बनाई होटल, सम्मेलन केन्द्र, पर्वतारोहण प्रशिक्षण केन्द्र, स्की खेलका पूर्वाधार, मनोरञ्जन पार्क, क्यासिनो लगायत संरचना बनाएर सञ्चालन गर्ने तयारी गरेको छ।

त्यसका लागि पर्यटन मन्त्रालयले आइतबार सहसचिव कमलप्रसाद भट्टराईको संयोजकत्वमा कार्यदल गठन गरेको छ। पर्यटन विभागका महानिर्देशक डण्डुराज घिमिरे, नेपाल पर्यटन बोर्डका प्रमुख कार्यकारी अधिकृत डा. धनञ्जय रेग्मी, तारागाउँ विकास समितिका अध्यक्ष प्रल्हाद नेउपाने सदस्य रहेको कार्यदलले ककनीको सार्वजनिक स्थानको अधिकतम उपयोग र लगानी मोडालिटी तय गर्नेछ।

कार्यदललाई १५ दिनभित्र अवधारणापत्र पेश गर्न कार्यादेश दिइएको मन्त्रालयका शाखा अधिकृत कमल भट्टराईले जानकारी दिए। संस्कृति, पर्यटन तथा नागरिक उड्डयनमन्त्री योगेश भट्टराईले शनिबार मात्र ककनीको अवलोकन गरेका थिए।
 


Leave a Reply

Your email address will not be published.