गान्धीको चश्मा १९ हजार डलरमा लिलाम हुँदै

गान्धीको चश्मा १९ हजार डलरमा लिलाम हुँदै

बेलायतको एक व्यस्त औद्योगिक भवनको एउटा पत्रमञ्जुसा (लेटरबक्स) मा झुन्डिएको अवस्थामा फेला परेको चश्मा लिलाम हुन लागेको छ। 

भारतीय स्वतन्त्रता सेनानी महात्मा गान्धीको विश्वास गरिएको उक्त चश्मा १९ हजार अमेरिकी डलरभन्दा बढीमा लिलाम हुने भएको हो। 

करिब चार साताअघि सोमबार बिहान पुराना सामान लिलामकर्ता एन्डी स्टो दक्षिणपश्चिम बेलायतको ब्रिस्टलस्थित एक औद्योगिक भवनमा रहेको उनको कार्यालयमा लेटरबक्स जाँच गर्दै थिए। 

‘मैले हाम्रो लेटरबक्समा एउटा चिठी झुन्डिरहेको देखेँ,’ उनले भने। 

जब एक सहकर्र्मीले चिठी खोले, तिनले एउटा असामान्य सामग्री– सुनौलो गोलाकार फ्रेम भएको चश्मा भेट्टाए। 

‘त्यहाँ तिनले एउटा सानो नोट पनि फेला पारे जसमा लेखिएको थियो– ‘यी गान्धीका सामग्री मेरो काकालाई दिइएका हुन्।’ 

‘उक्त नोटमा भएको फोन नम्बरमा कल गरेर सामग्री विक्रेतालाई फेला पारेँ, जो एक स्थानीय वृद्ध थिए,’ स्टोले भने। ती व्यक्तिले स्टोलाई दक्षिण अफ्रिकामा काम गर्दैगर्दा गान्धीले उक्त चश्मा उनको काकालाई दिएको र काकाले पछि उनलाई पठाएको जानकारी दिएका थिए। 

‘काका त्यतिबेला ब्रिटिस पेट्रोलियमको दक्षिण अफ्रिकी शाखामा काम गर्थे। त्यसैले यो अनुमान गर्न सकिन्छ कि गान्धीले उनका केही राम्रो कामका लागि धन्यवादस्वरूप उपहार दिएका थिए,’ लिलामीघर इस्ट ब्रिस्टल अक्सन्सको आइटम गाइडमा उल्लेख छ। 

‘हामीले केही अनुसन्धान ग-यौं र ती सामग्री मूल्यवान भएको पत्ता लाग्यो,’ स्टोले थपे, ‘त्यो चश्माको मूल्य १० हजारदेखि १५ हजार पाउन्डबीच रहेको छ तर चश्मा अझै बढी मूल्यमा बिक्री हुने आसा छ। पछि जब मैले उनलाई फोन गरेर चश्माको कति मूल्य राख्दैछौं भन्ने बताएँ तब मलाई लाग्छ उनी कुर्सीबाट लडे नै होला।’

स्टोले लिलामी सामग्रीको समयरेखाबारे अनुसन्धानपछि उक्त चश्मा र त्यसको कथामाथि विश्वस्त भएको बताए। 

‘मिति र तथ्य मेल खान्छन्। ती व्यक्ति ८० वर्षीय वृद्घ हुन् र उनले आफैं कथा बुनेको जस्तो मलाई लाग्दैन,’ उनले भने, ‘हाम्रो दृष्टिकोणमा इतिहास र कथा पूर्णरूपमा मिल्छ।’ 

उनका अनुसार ती भलादमीले मलाई ती सामग्री मूल्यवान नभएमा तिनलाई फोहरको भाँडोमा फाल्छु भनेका थिए। उनलाई ती सामग्री कति मूल्यवान छन् भनेर केही थाहा थिएन भन्ने कुरामा आफू विश्वस्त रहेको उनले बताए। 

चश्मा आगामी अगस्ट २१ मा लिलाम गरिने छ।

(सिएनएनमा प्रकाशित सामाग्रीबाट अनुवादित)


Leave a Reply

Your email address will not be published.