उद्योग वाणिज्य महासंघकाे मतदान सकियो, मतगणनाको तयारी

उद्योग वाणिज्य महासंघकाे मतदान सकियो, मतगणनाको तयारी

नेपाल उद्योग वाणिज्य महासंघ (एफएनसिसिआई) को मतदान सम्पन्न भएको छ। शनिबार काठमाडौंका तीन स्थानमा मतदान भएकामा जिल्ला/नगर, वस्तुगत र एसोसिएटतर्फ सतप्रतिशत मत खसेको छ।

महासंघमा जिल्ला/नगरतर्फ १ सय ५, वस्तुगततर्फ १ सय १ र एसोसिएटतर्फ ९ सय ४ मतदाता छन्। 

यो निर्वाचनबाट महासंघको आगामी कार्यकालका लागि एक वरिष्ठ उपाध्यक्षसहित जिल्ला/नगर, वस्तुगत र एसोसिएटतर्फबाट एक-एक जना उपाध्यक्ष निर्वाचित गर्नेछ। त्यसैगरी, कार्यकारिणी सदस्य पदमा ६० जनालाई निर्वाचित गर्नेछ।

वरिष्ठ उपाध्यक्षका लागि किशोर प्रधान र चन्द्र ढकाल प्यानलसहित प्रतिस्पर्धामा छन्। 
    
ढकालको समूहबाट एसोसिएट उपाध्यक्षमा रामचन्द्र संघाई, वस्तुगत उपाध्यक्षमा उमेशलाल श्रेष्ठ र जिल्ला/नगर उपाध्यक्षमा गुणनिधि तिवारी तथा प्रधानको समूहबाट एसोसिएट उपाध्यक्षमा सौरभ ज्योति, वस्तुगत उपाध्यक्षमा अञ्जन श्रेष्ठ र जिल्ला/नगर उपाध्यक्षमा दिनेश श्रेष्ठले प्रतिस्पर्धामा छन्।

निर्वाचन समितिका अनुसार मतपत्र कमलादी पुर्‍याएर मत गणना सुरु गरिने छ।

वरिष्ठ उपाध्यक्ष, तीन उपाध्यक्ष र ६० कार्यकारिणी सदस्यका लागि १ सय २७ जना चुनावी मैदानमा छन्। वरिष्ठ उपाध्यक्ष शेखर गोल्छा आगामी कार्यकालका लागि स्वत: अध्यक्ष बन्दैछन्।


Leave a Reply

Your email address will not be published.