काठमाडौं महानगरलाई चीनकाे ल्हासा नगरले दियो दुई फाेहाेर बाेक्ने ट्रक उपहार

काठमाडौं महानगरलाई चीनकाे ल्हासा नगरले दियो दुई फाेहाेर बाेक्ने ट्रक उपहार

चीनको ल्हासा नगरले काठमाडौँ महानगरपालिकालाई दुई थान फोहर बोक्ने कम्प्रेस्ड गारवेज ट्रक उपहार दिएको छ। 

२०७६ सालको इन्द्रजात्रा अवलोकन गर्न ल्हासा नगरका प्रमुख गुहेओ गुहेओ आएको समयमा उनले काठमाडौँ सरसफाइका लागि ट्रक उपहार पठाउने बताएका थिए। सोहीअनुरुप ट्रक प्राप्त भएको हो। 

ल्हासा नगरसँग कामपाको भगिनी सम्बन्ध स्थापित भइसकेको छ।

यही १५ गते ल्हासा नगरको अन्तरराष्ट्रिय मामिलाका अधिकारीले कामपाको अन्तरराष्ट्रिय सम्बन्ध सचिवालयलाई उक्त ट्रक हस्तान्तरण गरेका थिए। 

त्यस अवसरमा अन्तरराष्ट्रिय सम्बन्ध सचिवालयका अधिकृत यम बसेल, वित्त विभागबाट उपनिर्देशक प्रवीण प्याकुरेल, विपद् व्यवस्थापन विभाग नगर प्रहरी नायब उपरीक्षक विष्णु जोशी, चालक बलराम चचामु र दीपक वैष्णव थिए। 

ती ट्रकको मूल्य करिब रु १ करोड ९० लाख रहेको छ। 

आज कामपाका प्रमुख शाक्यले ट्रकको साँचो यन्त्र तथा उपकरण महाशाखा प्रमुख पुरुषोत्तम शाक्यलाई हस्तान्तरण गरेका छन्। 

त्यसअघि प्रमुख प्रशासकीय अधिकृत राजेश्वर ज्ञवालीले प्रमुख शाक्यलाई साँचो हस्तान्तरण गरेका थिए। 

सात हजार २०५ किलोग्राम फोहोर कम्प्रेस बोक्नु यसको मुख्य विशेषता हो। सङ्कलित फोहोरलाई पछाडिको बकेटमा राखेपछि यन्त्रले फोहोरलाई विस्तारै उचाल्न थाल्छ। 

त्यसपछि कम्प्रेस्ड यन्त्रले फोहोर खाँदिन थाल्छ। यसको क्षमता पूरा भएपछि आफैँ आवाज दिएर जानकारी गराउँछ। 


Leave a Reply

Your email address will not be published.