७५ फिट अग्लो नेपाल आमाको मूर्ति बन्दै

७५ फिट अग्लो नेपाल आमाको मूर्ति बन्दै

कञ्चनपुरको भीमदत्त नगरपालिका–८ तिलाचौरस्थित भम्केनी धार्मिक पर्यटकीय क्षेत्रमा बन्ने नेपाल आमाको ७५ फिट अग्लो मूर्ति निर्माणको कार्य अगाडि बढाइएको छ।

मूर्ति निर्माणका लागि भ्याली कन्स्ट्रक्सनसँग रु १० करोड ८१ लाखमा ठेक्का सम्झौता गरिएको छ। ठेक्का सम्झौता अनुसार निर्माण कम्पनीले मूर्तिको नमूना तयार गरी कार्य अगाडि बढाएको छ। 

निर्माण कम्पनीले नेपाल आमाको निर्माण हुने मूर्तिका तीनवटा नमूना तयार गरेको छ। काठमाडौंबाट आउने विज्ञ टोलीले मूर्तिको नमूनाको अवलोकन, अध्ययन र विश्लेषण गरी तयार गरेको प्रतिवेदनका आधारमा मूर्तिका एउटा मूर्ति निर्माणका लागि छनोट गरिने महाकाली शारदापीठ जगद्गुरु आश्रम भम्केनी धामका सचिव बिर्खबहादुर मल्लले बताए। 

उनका अनुसार मूर्तिको फाउन्डेसनमा बन्ने कमलको फूललगायतको संरचना निर्माणको कार्य निर्माण कम्पनीले पूरा गरेको छ। सम्झौता भएको साढे तीन वर्षभित्र मूर्ति निर्माण गर्नुपर्ने छ। बालसन्त जगद्गुरुले नेपाल पैदलयात्रा गरेर संकलन गरेको रु दुई करोड, भीमदत्त नगरपालिकाले रु ५० लाख, प्रदेश सरकारको रु ५० लाख र संघीय सरकारको रु ५० लाख मूर्ति निर्माणका लागि लगानी गरिएको छ। 

अष्टधातुबाट बनाइने नेपाल आमाको मूर्ति निर्माणका लागि २५ टन तामा आवश्यक पर्ने र अहिले २२ टन मात्रै तामा रहेको छ। साढे तीन वर्षमा मूर्ति निर्माण पूरा हुने छ। निर्माण कम्पनीले भने दुई वर्ष नौ महिनामा मूर्ति निर्माण गरिसक्ने योजना बनाएको छ। 

तीन रोपनी जग्गामा मूर्ति निर्माण गरिने छ। मूर्तिको दाँयाबाँया गाई र बाघको मूर्ति, नेपालको नक्सा, नेपालका राष्ट्रिय प्रतीक चिह्न र नेपालको सबै तीर्थको प्रतिनिधित्व हुने गरी संग्राहालयसमेत निर्माण गरिने छ। चार वर्षअघि जगद्गुरु मोहनशरण देवाचार्यले भम्केनी धामलाई धार्मिक पर्यटकीय गन्तव्य बनाउका लागि मौनव्रतदेखि नेपालभर पैदल भ्रमण गरेका थिए।

जगद्गुरुले विसं २०७२ वैशाखमा नेपाल आमाको मूर्ति निर्माणका लागि महाकालीदेखि मेचीसम्म पैदलयात्रा गरेका थिए। जगद्गुरुले महाकाली–मेची पैदल यात्राका दौरान रु १ करोड ८४ लाख ७२ हजार संकलन भएको थियो।

भम्केनी धाममा रहेका कुण्डमा भकभक गरेर पानी निस्कने भएकाले यसको नाम भम्केनी रहन गएको भनाइ छ । 

धार्मिकजनका अनुसार पौराणिककालमा भम्केनीमा ६ कुण्ड थिए। तीमध्ये पाँच पाण्डव र एक द्रौपदीको कुण्ड थियो। भीमले एक द्रौपदीका लागि नुहाउन कुण्ड बनाएको भम्केनी धामका अध्यक्ष कृष्णबहादुर सिंहले बताए। अहिले पनि भम्केनीमा पौराणिक ६ कुण्ड रहेका छन्। रासस


Leave a Reply

Your email address will not be published.

थप समाचार