रञ्जन कोइराला पक्राउ परे

रञ्जन कोइराला पक्राउ परे

सशस्त्र प्रहरीका पूर्व डिआइजी रञ्जन कोइराला पक्राउ परेका छन्।

जेल सजायमा छुट दिने यसअघिको फैसला सर्वोच्च अदालतले उल्टाइदिएको भोलिपल्टै उनी पक्राउ परेका हुन्। बानेश्वरस्थित आफन्तको घरमा लुकेका उनलाई शुक्रबार बेलुकातिर प्रहरीले पक्राउ गरेकाे हाे।

कर्तव्य ज्यान मुद्दामा कैद सजायमा छुट दिने सर्वोच्च अदालतको फैसलालाई सर्वोच्चका कामु प्रधानन्यायाधीश दीपककुमार कार्की, टंक मोक्तान र कुमार चुडालको बिहीबारको इजलासले उल्टाउने फैसला गरेको हो।

महाअभियोगपछि निलम्बनमा रहेका प्रधानन्यायाधीश चोलेन्द्र शमशेर राणा र न्यायाधीश तेजबहादुर केसीको संयुक्त इजलासले जन्मकैदको सजायमा छुट दिन फैसला गरेको थियो।

 

उक्त फैसलालाई उल्टाउँदै कोइरालालाई जन्मकैदको सजायमा सहुलियत दिन नसकिने फैसला सुनाएको हो। यसअघि गत १५ असारमा सर्वोच्चले कोइरालालाई सजायमा सहुलियत दिँदै २० वर्षको कैदलाई साढे ८ वर्ष हुने भनी सजाय घटाउने फैसला गरेको थियो।

२०६८ सालमा श्रीमती गीता ढकालको हत्या गरी शवसमेत नष्ट गरेकोमा तत्कालिन डिआइजी कोइरालालाई ७ वैशाख २०७१ मा काठमाडौं जिल्ला अदालतले सर्वस्वसहित जन्म कैदको सजाय सुनाएको थियो। जिल्ला अदालतले हत्याबाट नै श्रीमती गीता ढकालको मृत्यु भएको ठहर गरेको थियो।

पुनरावेदन अदालत पाटनले पनि त्यसैलाई सदर गरेको थियो। तर, सर्वोच्च अदालतले २० वर्षको कैदलाई साढे ८ वर्ष हुने भनी सजाय घटाएको थियो। सर्वोच्चको फैसलापछि कोइराला जेलबाट रिहा भएका थिए।

 


Leave a Reply

Your email address will not be published.