रकम भुक्तानी नपाए असार २० देखि स्वास्थ्य बिमा कार्यक्रम स्थगित गर्ने बीएण्डसी र नोबेलको चेतावनी

रकम भुक्तानी नपाए असार २० देखि स्वास्थ्य बिमा कार्यक्रम स्थगित गर्ने बीएण्डसी र नोबेलको चेतावनी

काठमाडौं–झापाको बीएण्डसी अस्पताल र विराटनगरको नोबेल मेडिकल कलेजले यही असार २० गतेदेखि स्वास्थ्य बिमा कार्यक्रम बन्द गर्ने जनाएका छन्। स्वास्थ्य बिमा कार्यक्रमअन्तर्गत बिमितको उपचार सेवावापतको रकम लामो समयदेखि आफूहरुले नपाएको भन्दै त्यसका सञ्चालकहरुले स्वास्थ्य बिमा कार्यक्रमअन्तर्गतको सेवा सञ्चालन नगर्ने जनाएका हुन्।

बुधबार काठमाडौंमा पत्रकार सम्मेलन गर्दै बीएण्डसी अस्पतालका सञ्चालक दुर्गा प्रसाईंले मंसिरयता आफ्नो अस्पतालले बिमा कार्यक्रमवापत पाउनुपर्ने ४५ करोडभन्दा बढी रकम रोकिएको बताए। रकमका लागि स्वास्थ्य बिमा बोर्डमा ताकेता गरे पनि ३ महिनादेखि भोलि, पर्सी, अर्को हप्ता भनेर जवाफ दिइने गरिएको उनले बताए।

प्रसाईंका अनुसार बीएण्डसी अस्पतालबाट दैनिक रुपमा १ हजारभन्दा बढी नागरिकले स्वास्थ्य बिमा कार्यक्रमअन्तर्गत सेवा लिने गरेका छन्।

यस्तै, नोबेल मेडिकल कलेजका भीमबहादुर चन्दले नोबेलमा पनि दैनिक १ हजार ५ सयभन्दा बढी बिरामीले बिमाअन्तर्गत सेवा लिन गरेको बताए। उनका अनुसार नोबेलले पनि मंसिरयता ५४ करोड ३८ लाख रुपैयाँ बिमा कार्यक्रमअन्तर्गत लिन बाँकी छ।

चन्दले आफूहरुको पैसा रोकिँदा कलेजले ३ महिनादेखि कर्मचारी तथा प्राज्ञिक जनशक्तिलाई तलब खुवाउन नसकेको र यसको असर पठनपाठनमा पनि पर्ने उल्लेख गरे।

प्रसाईंले बिमा बोर्डले बिरामीको उपचार गरेवापतको पैसा अड्काएर आफूहरुलाई मर्का पारेको उल्लेख गर्दै अब आफूहरुले पनि कर बुझाउन नसक्ने र सरकारले जरिवाना पनि लगाउन नपाइने बताए।

यस्तै, विराट मेडिकल कलेजले पनि रकम भुक्तानी नपाए बिमा कार्यक्रम बन्द गर्ने जनाएको छ।

यसअघि रकम भुक्तानी नपाएको भन्दै काठमाडौंको शिक्षण अस्पतालले पनि स्वास्थ्य बिमा कार्यक्रम बन्द भएको घोषणा गरिसकेको छ।

 


Leave a Reply

Your email address will not be published.